വിശാലമായ വളപ്പില്‍ വലിയ ഒരു വീട്. അവിടേക്ക് ഒരു മനുഷ്യനും കടന്ന് ചെല്ലാതിരിക്കാന്‍ രണ്ടാള്‍ പൊക്കത്തില്‍ ഒരു മതിലും കൂറ്റന്‍ ഒരു ഗെയ്‌റ്റും. ആരും മതില്‍ ചാടി അവിടേക്ക് കടന്നു ചെല്ലാതിരിക്കാന്‍ ആ മതിലുനു മുകളില്‍ ആണികളും കുപ്പിച്ചില്ലുകളും പാകിയിരിക്കുന്നു. ആര്‍ക്കും ആ വീട്ടിലേക്ക് അനുവാദം കൂടാതെ പ്രവേശനം ഇല്ല. വലിയ മതിലുകളില്‍ തന്നെ ആവണമെന്നില്ല ഈ ആണി,കുപ്പിച്ചില്ല് പ്രയോഗങ്ങള്‍. നമ്മുടെ തോളറ്റം പൊക്കമുള്ള മതിലുകളില്‍ പോലും ആണി, കുപ്പിച്ചില്ല് പ്രയോഗങ്ങള്‍ കണ്ടിട്ടൂണ്ട്. അറിയാതെ ആ മതിലുകളുടെ മുകളില്‍ കൈകള്‍ വെച്ചാല്‍ കൈ കീറും. ഇതുപോലെ തന്നെയാണ് നമ്മളും. നമ്മളും നമുക്ക് ചുറ്റും ഓരോരോ മതില്‍ കെട്ടിപൊക്കിയിട്ടൂണ്ട്. ആര്‍ക്കും കടന്നു വരാനാവത്ത മതിലുകള്‍. നമ്മള്‍ സ്വയം നിര്‍മ്മിച്ച മതിലുകള്‍ക്കുള്ളില്‍ ശ്വാസം മുട്ടി മരിക്കേണ്ടിവരുമെന്ന് അറിയാതെയാണോ നമ്മള്‍ ഈ മതിലുകള്‍ കെട്ടിപൊക്കുന്നത് ????
ലിംഗവെത്യാസം എന്ന മതില്‍ക്കെട്ട്
നമ്മള്‍ നമ്മുടെ മക്കളില്‍ ആദ്യം പണിതുകൊടുക്കുന്ന മതിലാണ് ലിംഗവെത്യാസം. ഒരാണും പെണ്ണും കൂടി സംസാരിക്കുന്നതും , ഒരുമിച്ച് യാത്ര ചെയ്യുന്നതോ ഒക്കെ വലിയ തെറ്റാണ് എന്നുള്ള ധാരണ അറിഞ്ഞോ അറിയാതയോ നമ്മള്‍ നമ്മുടെ കുട്ടികളുടെ മേല്‍ അടിച്ചേല്‍പ്പിക്കുന്നു. കുട്ടികള്‍ വളരുന്നതോടൊപ്പം അവരുടെ മേലുള്ള നിയന്ത്രണങ്ങളും വര്‍ദ്ധിപ്പിക്കുന്നു. അവരുടെ മനസിനെ സ്പ്രിംങ്ങ് അമര്‍ത്തും പോലെ നമ്മള്‍ അമര്‍ത്തി നിയന്ത്രിക്കുന്നു. അവസാനം കൈ ഒന്ന് അയയുമ്പോള്‍ സ്പ്രിംങ്ങ് തെറിച്ച് പോകുന്നതുപോലെ കുട്ടികളും നീയന്ത്രണത്തില്‍ നിന്ന് പുറത്തേക്ക് പോകുന്നു. തെറ്റുകളും ശരികളും മനസിലാക്കി നല്‍കുന്നതിനു പകരം അവരുടെ ഉള്ളില്‍ ലിംഗവെത്യാസം എന്ന മതില്‍ക്കെട്ട് പണിത് ഉയര്‍ത്താനാണ് കുടുംബവും സമൂഹവും ശ്രമിക്കുന്നത്. വിദ്യാഭ്യാസ സ്ഥാപനങ്ങളും അതേ മാര്‍ഗ്ഗം പിന്തുടരുന്നു.
ഞാന്‍ പഠിച്ച കോളേജില്‍ ക്യാമ്പസിനുള്ളില്‍ ആണ്‍കുട്ടികളും പെണ്‍കുട്ടികളും ഒരുമിച്ച് നടകുകയോ സംസാരിക്കു കയോ ചെയ്യാന്‍ പാടിലായിരുന്നു. ആണ്‍കുട്ടികളും പെണ്‍കുട്ടികളും ഒരുമിച്ച് സംസാരിച്ച് നടക്കുന്നത് കണ്ടാലുടനെ സെക്യൂരിറ്റി വിസിലടിക്കും. ഇത്തരം നിയന്ത്രണങ്ങള്‍ അറിഞ്ഞു കൊണ്ടു തന്നെ തങ്ങളുടെ കുട്ടികളെ ഇവിടെ ചേര്‍ക്കുന്നവര്‍ ഉണ്ട്. (ഞങ്ങളൊക്കേ ഇതൊക്കെ അറിയാതെ ചെന്നവരായിരുന്നു). പക്ഷെ ഈ നിയന്ത്രണം ക്യാമ്പസിനുള്ളില്‍ മാത്രമേ ഉള്ളൂ. ക്യാമ്പസിന്റെ മതില്‍ക്കെട്ട് കടന്നാല്‍ അകത്തെ നിയന്ത്രണങ്ങള്‍ എത്രയും അധികം ലംഘിക്കാന്‍ പറ്റുമോ അത് ചെയ്യാന്‍ ചിലര്‍ ശ്രമിക്കും. ആരോടെയൊക്കയോ ഉള്ള പ്രതികാരം തീര്‍ക്കാനായി.
വിദ്യാഭ്യാസ രംഗത്ത് മാത്രമാണ് ഈ ലിംഗവെത്യാസത്തിന്റെ മതില്ക്കെട്ടുകള് ഉള്‍ലതെന്ന് കരുതിയാല്‍ തെറ്റി. തൊഴില്‍ ഇടങ്ങളിലും എന്തിന് കുടുംബങ്ങളില്‍ പോലും ഈ മതില്ക്കെട്ടുകള് ഉയര്‍ന്നിട്ടുണ്ട്.
മതത്തിന്റെ മതില്ക്കെട്ടുകള്
സമ്പൂര്‍ണ്ണ സാക്ഷരത നേടിയ സംസ്ഥാനം, ഉന്നത വിദ്യാഭ്യാസം ആര്‍ജിച്ച ആള്‍ക്കാരുടെ എണ്ണം കൂടുതലുള്ള സംസ്ഥാനം എന്നൊക്കെ കേരളത്തെ വിശേഷിപ്പിക്കുന്നതില്‍ ഓരോ മലയാളിയും അഭിമാനിക്കുന്നുണ്ടങ്കിലും മനുഷ്യര്‍ ഇപ്പോഴും മതത്തിന്റെ മതില്‍‌കെട്ടിനുള്ളില്‍ ശ്വാസം കിട്ടാതെ വിഷമിക്കുകയാണ്. മതത്തിന്റേയും സമുദായത്തിന്റേയും ഉപസമുദായത്തിന്റേയും ഒക്കെ പേരില്‍ ജനങ്ങളേ വര്‍ഗ്ഗീകരിച്ച് മുതലെടുക്കുന്നവരെ മനസിലാക്കാന്‍ ഇപ്പോഴും നമുക്ക് കഴിയുന്നില്ല. ജന്മം കൊണ്ട് തങ്ങള്‍ക്ക് ലഭിച്ച ജാതി,സമുദായത്തിന്റെ ലേബല്‍ ചിലരെ വേട്ടയാടുകയും ചിലരുടെ ജീവിതം ദുഷ്ക്കരമാക്കുകയും ചിലര്‍ക്ക് അത് ജീവനത്തിനുള്ള അതിജീവനം ആവുകയും ചെയ്യുന്നു. മതത്തിന്റെയ്യും സമുദായത്തിന്റേയും പേരില്‍ ലഭിക്കുന്ന സംവരണം നിനനില്‍ക്കുന്ന കാലത്തോളം മതത്തിന്റെ വേലിക്കെട്ടുകളുടെ നിര്‍മ്മാണത്തിന് ബലം കൂടുകയേ ചെയ്യുകയുള്ളൂ എന്ന് നിസംശയം പറയാന്‍ കഴിയും.
മതത്തിന്റെ പേരില്‍ ഒരു ജനതയെ വിഭജിച്ചുകൊണ്ടുള്ള സ്വാതന്ത്ര്യ സമര വിജയത്തോടെ നമുക്ക് ലഭിച്ചത് മത വേലിക്കെട്ടുകള്‍ നിര്‍മ്മിച്ചുകൊണ്ട് ഒരു ജനതയെ എങ്ങനെ നശിപ്പിക്കാം എന്നുള്ളതിന്റെ പരീക്ഷണ ഫലമായിരുന്നു. പിന്നീട് രാഷ്ട്രീയമായ വിജയം നേടാനും വിജയം നിലനിര്‍ത്താനും ഈ മതവേലിക്കെട്ടുകള്‍ ഒരേ സമയം രാഷ്ട്രീയക്കാരും മത നേതാക്കളും ഉപയോഗിച്ചു വിജയം നേടുന്നു.
കുട്ടികളെ മതത്തിന്റെ പേരില്‍ വേര്‍തിരിച്ച് മതിലുകള്‍ കെട്ടി ഉയര്‍ത്താന്‍ പലരുംശ്രമിക്കൂകയാണ്. തങ്ങളുടെ സമുദായത്തിലെ കുട്ടികളെ സമുദായ സ്കൂളില്‍ മാത്രമെ പഠിപ്പിക്കാവൂ എന്ന രീതിയിലുള്ള ഇടയലേഖനം ഇറക്കാന്‍തക്കവണ്ണമുള്ള മാനസികവിഭ്രാന്തിയിലേക്ക് കേരളസമൂഹം തരംതാണിരിക്കൂകയാണോ ഇപ്പോള്‍ ??????? മനുഷ്യരെ എല്ലാവരേയും ഒരേപോലെ കാണാതെ സമുദായാടിസ്ഥാനത്തില്‍ മാത്രം ‘സഹോദരങ്ങളെ’ തിരിച്ചറിയുന്നതുമാത്രമാണോ വിദ്യാഭ്യാസം ?????
രാഷ്ട്രീയത്തിന്റെ മതില്‍‌കെട്ടുകള്‍
പാര്‍ട്ടി ഗ്രാമങ്ങളും പാര്‍ട്ടി വിലക്കുകളും ഒക്കെ ഇന്ന് ചില സ്ഥലങ്ങളില്‍ നിലനില്‍ക്കുന്നു എന്ന് കേള്‍ക്കുമ്പോള്‍ അത്ഭുതമാണോ ഞെട്ടലാണോ നമുക്ക് തോന്നുന്നത്.? രാഷ്ട്രീയ വിശ്വാസങ്ങളുടെ പേരില്‍ മനുഷ്യരെ കൊന്നൊടുക്കുന്നതിനെ എങ്ങനെ ന്യായീകരിക്കാന്‍ കഴിയുന്നു? എന്തിനാണ് രാഷ്ട്രീയത്തിന്റെ പേരിലും മനുഷ്യരെ അകറ്റി നിര്‍ത്തുന്നത്? ഒരു രാഷ്ട്രീയ പാര്‍ട്ടിയില്‍ വിശ്വസിക്കുന്നു എന്നതുകൊണ്ട് അയാള്‍ വെറുക്കപെടേണ്ടവനല്ല. ആശയങ്ങളുടെ പേരില്‍ സംഘടനം ഉണ്ടാകുമ്പോള്‍ അതിന്റെ അവസാനം രക്തം ചൊരിയലല്ല. വോട്ട് രാഷ്ട്രീയത്തിനു വേണ്ടി രാഷ്ട്രീയ നേതാക്കള്‍ തങ്ങളുടെ അണികള്‍ക്കും/തങ്ങളെ വിശ്വസിക്കുന്നവര്‍ക്കും ചുറ്റും ഒരു വേലി കെട്ടിയിരിക്കുന്നു. ആ വേലി കടന്നു പോകാന്‍ അവര്‍ക്ക് കഴിയുന്നുമില്ല.
വീടും മതില്‍ക്കെട്ടും
വലിയ ഒരു ഇരുനില വീട്. അതിനു വലിയ ഒരു മതില്‍. വീടിനകത്ത് പുറം‌ലോകവുമായി ഒരു ബന്ധവും ഇല്ലാതെ കഴിയുന്ന വൃദ്ധ ദമ്പതികള്‍. അവിടേക്കും ബന്ധുക്കളാരും ചെല്ലില്ല. ഇനി ചെന്നാല്‍ തന്നെ ആ വൃദ്ധര്‍ അവരോട് അടുപ്പവും കാട്ടില്ല. പട്ടിണി മരണമോ അപകട മരണമോ ഉണ്ടാകുമ്പോള്‍ ആ വലിയ വീട് വാര്‍ത്തകളില്‍ നിറയുന്നു. ഇങ്ങനെയുള്ള ചില വാര്‍ത്തകള്‍ നമ്മള്‍ ഇടയ്ക്കിടയ്ക്ക് വായിക്കാറൂണ്ട്. ഈ വാര്‍ത്തകള്‍ ഇപ്പോള്‍ നമ്മുടെ ഉള്ളിലൊരു നൊമ്പരവും ഉണര്‍ത്താറില്ല. മനുഷ്യ ബന്ധങ്ങളില്‍ പോലും നമ്മള്‍ വേലികെട്ടികഴിഞ്ജിരിക്കുന്നു. ഒരു പക്ഷെ സമ്പത്തിന്റെ അന്തരം ആയിരിക്കാം ആ വീടുകളില്‍ താമസിക്കുന്നവരെ മറ്റുള്ളവരില്‍ നിന്ന് അകറ്റുന്നത്. അല്ലങ്കില്‍ അവര്‍ തങ്ങളുടെ സ്വത്ത് തട്ടിയെടുക്കുമെന്നുള്ള ഭയം. ലക്ഷ പ്രഭു,കോടിപതി ഭിക്ഷക്കാരനെപ്പോലെ വഴി വക്കില്‍, വീട്ടില്‍ നോക്കാന്‍ ആളില്ലാതെ പുഴുവരിച്ചു കിടക്കുന്നു എന്നൊക്കെ ഉള്ള വാര്‍ത്തകള്‍ നമുക്ക് പുതുമ അല്ലാതായി തീര്‍ന്നിരിക്കുന്നു.
കെട്ടിയുയര്‍ത്തുന്ന മതിലുകള്‍ നമ്മള്‍ മലയാളികള്‍ നമ്മുടെ ഹൃദയങ്ങളിലേക്കുംകൊണ്ടുവന്നു കഴിഞ്ഞു. ഇല്ലായ്‌മകളിലെ കൊടുക്കല്‍ വാങ്ങലുകളീലൂടെ വളര്‍ന്ന നമ്മുടെ ‘ഓള്‍ഡ് ജനറേക്ഷന് ‘ ഇന്ന് ‘ന്യൂ ജനറേക്ഷന് ‘വഴിമാറുമ്പോള്‍ എന്തുകൊണ്ടാണ് നമ്മുടെ ഇന്നത്തെ കേരളസമൂഹത്തിലെ മധ്യവര്‍ഗ്ഗസമൂഹത്തില്‍ ആത്മഹത്യകള്‍ കൂടുന്നതന്ന് നിങ്ങള്‍ചിന്തിച്ചിട്ടുണ്ടോ ?? ഏത് വഴി ഉത്തരം കണ്ടെത്താന്‍ ശ്രമിച്ചാലും കിട്ടുന്ന ഉത്തരം ഒന്നു‌തന്നെയാണ്. മനുഷ്യമനസുകളില്‍ സ്വയം കെട്ടിഉയര്‍ത്തിയ മതില്‍‌കെട്ടുകള്‍ !!!!!!!!!!!!!!! ആരേയും ഉള്ളിലേക്ക് കടത്തിവിടാതെ ‘സ്വയം’ അഥവാ ‘ഞാന്‍’ എന്ന് ചിന്തയില്‍ കെട്ടുന്ന മതില്‍കെട്ടില്‍ശ്വാസം മുട്ടി മരിക്കുകയല്ലേ മലയാളികള്‍ ......
കൂട്ടു‌കുടുംബത്തില്‍ നിന്ന് അണുകുടുംബത്തിലേക്ക് മാറിയപ്പോള്‍ വിശാലമായ അകത്തളങ്ങളില്‍ നിന്ന് നമ്മള്‍ കയറിക്കൂടിയത് മതില്‍‌കെട്ടുകളില്‍ഒളിപ്പിക്കാന്‍ ശ്രമിക്കുന്ന ഇല്ലായ്‌മ,വല്ലായ്‌മകളിലേക്കും ആണ്. മനസുകള്‍ ചുരുങ്ങിയപ്പോള്‍ നഷ്ടപ്പെട്ടുപോയ ഹൃദയം മറ്റുള്ളവര്‍ കാണാതിരിക്കാന്‍വേണ്ടിയാണോ നമ്മള്‍ വലിയ മതിലുകള്‍ പണിയാന്‍ തുടങ്ങിയത്. തങ്ങളുടെ വസ്തുവകകള്‍ സംരക്ഷിക്കുക എന്നതില്‍ ഉപരി തങ്ങളുടെ താമസസ്ഥലത്തേക്ക് ആരും കയറി‌വരരുത് എന്നുള്ള ഒരൊറ്റ ലക്ഷ്യത്തില്‍ അധിഷ്ഠിതമായിട്ടാണ് ഈ മതില്‍‌കെട്ടുകള്‍. ഉയര്‍ത്തുന്ന മതിലുകളില്‍ ഞെരിഞ്ഞമരുന്നത് ‘സ്വയം‘ ആണന്നുള്ള ചിന്തകള്‍ വരുമ്പോഴേക്കും ജീവിതം ജീവിതമതില്‍‌കെട്ടിനു പുറത്തായിരിക്കും. കെട്ടിഉയര്‍ത്തുന്ന മതിലുകളും,കെട്ടിയടയ്ക്കപ്പെടുന്ന വഴികളും ,മാന്തുന്ന അതിരുകളും നമ്മുടെ ഇന്നത്തെ ജീവിതത്തിന്റെ ഭാഗമായി തീര്‍ന്നിരിക്കുകയാണ്. ‘ന്യൂ ജനറേക്ഷന്’ ഇന്ന്‘ഓള്‍ഡ് ജനറേക്ഷനെ ‘ കെട്ടിയുയര്‍ത്തുന്ന മതില്‍ക്കെട്ടുകള്‍ക്കുള്ളിലെ തടവുകാരാക്കി കഴിഞ്ഞു. ഇങ്ങനെ തീര്‍ക്കുന്ന തടവറകള്‍ ഒരു സാമൂഹികവിപത്തായി മാറിയതുകൊണ്ട് സര്‍ക്കാരുകള്‍ പോലും നിയമനിര്‍മ്മാണത്തിന് തയ്യാറാകുന്നത്. വൃദ്ധരായ മാതാപിതാക്കളെ വേണ്ട‌രീതിയില്‍സംരക്ഷിക്കാത്ത മക്കള്‍ക്ക് എതിരെ നിയമനിര്‍മ്മാണം നടത്താന്‍ നമ്മുടെ നിയമനിര്‍മ്മാണ സഭകള്‍ തയ്യാറെടുക്കുകയാണന്ന് കേട്ട് ഞെട്ടുന്നതിനുമുമ്പ് ഒന്നുകൂടി അറിയുക. ഇന്ന് ഏറ്റവും കൂടുതല്‍ വൃദ്ധസദനങ്ങള്‍ ഉള്ളത് സാക്ഷരതയില്‍ മുന്‍പന്തിയില്‍ നില്‍ക്കുന്ന, വിദ്യാസമ്പന്നര്‍ എന്ന് സ്വയം അഭിമാനിക്കുന്ന മലയാളികളുടെ, ദൈവത്തിന്റെ സ്വന്തം നാട്ടിലാണ്. ഇത്ല് നമുക്ക് ഒരുമിച്ച് അഭിമാനിക്കാം. സര്‍ക്കാര്‍‌പോലും വൃദ്ധസദനങ്ങള്‍തുടങ്ങാന്‍ പോവുകയാണ്. (സാമ്പത്തിക പ്രതിസന്ധി എല്ലാ ബിസിനസ് മേഖലകളീലും ബാധിച്ചുവെങ്കിലും ‘വൃദ്ധസദന‘ ബിസിനസ്സിന്റെഏഴയലോക്കത്ത് പോലും സാമ്പത്തിക പ്രതിസന്ധി എത്തിയിട്ടില്ല.).
മനുഷ്യരുടെ ഉള്ളില്‍ നമ്മള്‍ കെട്ടി ഉയര്‍ത്തുന്നമതിലുകള്‍ പൊളിച്ചുകളഞ്ഞ് നമ്മള്‍ ഇനിയെന്നാണ് നല്ല മനുഷ്യരായി തീരുന്നത് ???????? അതിനു നമുക്ക് സാധിക്കുമോ??
